އެއަރޕޯރޓް ބޭނުމެވެ،އަޅަންވެސްވީއެވެ. އެހެންނަމަވެސް އުމުރުދުވަހައްލިބެން އޮތް ތަރައްޤީގެ ވައިނޮޅި ބުރިކޮށްނުލާށެވެ.
އެއަރޕޯރޓް ބޭނުމެވެ،އަޅަންވެސްވީއެވެ. އެހެންނަމަވެސް އުމުރުދުވަހައްލިބެން އޮތް ތަރައްޤީގެ ވައިނޮޅި ބުރިކޮށްނުލާށެވެ.
މިލަންދޫ އެއަރޕޯރޓްގެ ކުރެހުން
ދިވެހިރާއްޖެ އުފެދިފައިވާ ގޮތުން ދަތުރުފަތުރުގެ ނިޒާމަކީ ރައްރަށަށް ނުހަނު ބޭނުންތެރި ނިޒާމެކެވެ. އަދި ކޮންމެ ސަރުކާރަކުންވެސް ނުހަނު އިސްކަންދޭ އަދި ރައްޔިތުން އަބަދުވެސް ނުހަނު ޑިމާންޑްކުރައްވާ ކަމެއްވެސްމެއެވެ. އެންމެފަހުން ނިމިގެންދިޔަ ރިޔާސީއިންތިބާހުގައިވެސް އެއަރޕޯރޓާއި ބަނދަރާއި ދަތުރުފަތުރާ ގުޅުންހުރި އެތަކެއް ވައުދުތަކެއް ހުރިހާ ކެނޑިޑޭޓުންވެސް ވަމުން ގެންދެވިއެވެ.
އެގޮތުން މިވަގުތު އެންމެ ބޮޑަށް ވައިގައި ހިފައިފައިވަނީ މިލަންދޫ އެއަރޕޯރޓެވެ. މިލަންދޫ ކައިރީ އޮންނަ ފުނަދޫގައި އެއަރޕޯރޓެއް އޮތްނަމަވެސް މިލަންދޫ ރައްޔިތުންގެ ޑިމާންޑާއެކު ޕީއެންސީ އަދި އެމްޑީޕީވެސް އެއަރޕޯރޓްގެ ވައުދުވިއެވެ. އަދި ޕީއެންސީ ވެރިކަމަށް އައުމުން ރައްޔިތުންނަށް އެފުރުސަތު ލިބުމުގެ މަގު ފަހިވިއެވެ. އެހެން ނަމަވެސް އުފެދޭ ސުވާލަކީ، އެއަރ ޕޯޓަކީ ކީއްކުރަން އަޅާ އެއްޗެއްބާއެވެ؟ އަދި އެއަރ ޕޯރޓެއް ރަށެއްގައި އަޅަނީ ކީއްކުރަންބާއެވެ. އަދި އެކަމުގެ ސަބަބުން ގައުމައް ރައްޔިތުންނަށް ލިބެންޖެހޭ މަންފާއަކީ ކޮބައިބައިބާއެވެ؟
ހަމަގައިމުވެސް މިލަންދޫގެ ފަޅާއި ބީޗާއި ގުދުރަތީ ވެއްޓަކީ އޭގެ ދެވަނައެއްނުވާފަދަ ވެއްޓެކެވެ. އަދި މުސްތަގުބަލުގައި އޭގެނަފާ އެންމެބޮޑައް ހޯދޭނެ އެއްބަޔަކީ ވެސް މިލަންދޫގެ ރައްޔިތުންނޭ ބުނުމުން ދޮގަކަށް ނުވާނެއެވެ. ތަރައްޤީވެ ފައްކާވަމުން އަންނަ ގެސްޓްހައުސް ވިޔަފާރިޔާ އާއި އަދި ޓްއަރިޒަމްގެ އެހެނިހެން ވިޔަފާރިޔާއި ގުޅިފައިވަނީ މިދެންނެވި ގުދުރަތީ ފަޅާއި ބީޗެވެ.
އަދި އަމުދުން ރައްޔިތުމީހާގެ ވެށި ކޮންކުރިޓް ވެއްޓަކަށް ބަދަލުނުވެ ތަރައްޤީ ހޯދަން އެންމެ މަގުފަހިވާނެ އެއްވަސީލަތަކީވެސް އެއީއެވެ. މިދައްކަނީ ރައްޔިތުމީހާގެ ހާސްކަންފިލުވާލާ ހިތަހަމަޖައްސާލަން އޮތް ރީތި ގުދުރަތީ ވެއްޓެއްގެ ވާހަކައެވެ. އެތައް ބިލިއަނެތް ހަރަދުކޮށްގެންވެސް ނުހެދޭނެފަދަ ރީތި މާހައުލެއްގެ ވާހަކައެވެ.
އެއަރޕޯރޓަކީ ހަމައެކަނި ދެކޮޅުދަތުރަށް މާލެ ގޮސްލަން އަޅާ ތަނެއްގެ ގޮތުގައިގެންގުޅޭ ވިސްނުން އެއީ މައިގަނޑު ވިސްނުންކަމުގައިވާނަމަ އެގެންގުޅެވެނީ މާރަނގަޅު ވިސްނުމެއްނޫނެވެ. އެއަޕޯރޓަކާއި ގުޅިފައިވާ އެތަކެއްތަރައްޤީގެ ވިސްނުންތަކެއް ގެންގުޅެންޖެހެއެވެ. އެއަރޕޯރޓްގެ ސަބަބުން ޒުވާނުންނަށް ވިޔަފާރި ފުޅާވާން ޖެހެއެވެ. ގެސްޓްހައުސްތަކާއި، ޑައިވިންއާއި، ވޯޓަރ ސުޕޯރޓްސްއާއި އެހެނިހެން ތަރައްޤީގެ މަސަތްކަތްތައް ރަށުގައި ޤާއިމްވާން ޖެހެއެވެ. މިހުރިހާ ފުރުސަތުތަކަށް އޮތް ގުދުރަތީވެށި ހަލާކޮށްލާފައި އެތާގައި އެއަރޕޯރޓެއް އެޅުމަކީ ބިސްއަޅާކުކުޅަކުން ލިބި ލިބި ހުރިބިސް ކެއުމުގެ ބަދަލުގައި ވަގުތީ މަންފާއަކަށް ކުކުޅު ކައިލުންކަހަލަ ކަމެކެވެ. ފަޅުގައި އެއަރޕޯރޓް އެޅުމުން އެހެން ބައެއް ރަށްރަށެކޭ އެއްފަދައިން ގާމަތީ ރަށަކަށް މިލަންދޫވެސް ބަދަލުވާނެއެވެ. މުޅިރަށް ބަންދުވެ ކޮންކުރިޓް ހާސްކަމެއްގެ ތެރެއަށް ދާނެއެވެ. ދެން އަރޓިފިސިއަލް ބީޗްކޮޅެއްހަދާގެން އެތާ ރައްޔިތުން ބަކަތަޅާތަން ބަލަން ތިބެންވީއެވެ.
އެއަރޕޯރޓް އެޅުމަކީ ރައީސް މުއިޒްގެ ރިޔާސީ ވައުދެކެވެ. ކޮންމެތާކުއެޅިޔަސް އެއަރޕޯޓެއް އެޅުނވިއްޔާ ވަރިހަމަ ވިސްނުން ހުދު ރައީސްވެސް ނުގެންގުޅުއްވާނެކަން ކަށަވަރެވެ. ހަރަދު ބޮޑުނަމަވެސް އިތުރަށް ހަރަދު ދިޔަނަމެސް އެކަމެއް ކުރަން އެންމެ އެކަށީގެންވާ ތާކު އެއަރޕޯރޓް އެޅުމަކީ އެންމެ ބުއްދިވެރި އަދި ފައިދާބޮޑު ގޮތެވެ. އެގޮތުން މިލަންދޫގައިނަމަ ފުއްޓަރުގައި ބައެއް ހިއްކައިގެން އެއަރޕޯރޓް އަޅައިފިނަމަ ހުރިހާގޮތަކުންވެސް ރައްޔިތުންނަށް ފައިދާއެވެ. މުޅިރަށް ކޮންކުރިޓި ޖަންގައްޔަކުން ސަލާމަތްވީއެވެ. ވިޔަފާރިއަށް އޮތް މަގުތައް ބަންދެއްނުވާނެއެވެ. ރައްޔިތުމީހާގެ ހިތްހަމަޖެހުމަށް އޮތް ގުދުރަތީ ޗާލުވެށި ހިމާޔަތް ކުރެވުނީއެވެ. ދިވެހިރާއްޖޭގެ ސިފަލިބިފައިވާ ހިތްގައިމު ޗާލު ރަށް ހިމާޔަތްކުރެވުނީއެވެ. ސިޔާސީ ބޭނުމަކަށް މިކަންކަން ނުހައްދަވައި މުޅިރައްޔިތުންނާއި ، ރައްޔިތުންގެ މުސްތަގުބަލައް ވިސްނަވާ މިފަދަކަންކަން ކުރަންޖެހެއެވެ.
ފުއްޓަރުގައި ބައެއް ހިއްކައިގެން އަދި ބައެއް ތަކެތި ނަގައިގެން އެއަރޕޯރޓް އެޅިނަމަވެސް ސަރުކާރަށް ވާނެ މާބޮޑުގެއްލުމެއްނެތެވެ. އަދި ދުރުމުސްތަގުބަލައް ވިސްނާނަމަ ސަރުކާރަށްވެސް ، ރައްޔިތުންނަށްވެސް ، ދިވެހިރާއްޖެއަށްވެސް، ހުރިހާ ސިނާއަތަކަށްވެސް އެންމެ ފައިދާވާނީ ގުދުރަތީ ވެށި ހިމާޔަތްކޮށް ތަރައްޤީޤެ ވައިނޮޅި ބުރިކޮށްނުލައި އެކަމަށް އެންމެ އެކަށީގެންވާތަނެއްގައި އެއަރޕޯރޓްއެޅުމެވެ.
What's Your Reaction?
