ފުޓްބޯޅައިގެ ހުރިހާ ހަރަކާތްތަކުން ބައްސާމް ސަސްޕެންޑް ކޮށްފި

އެފްއޭއެމްގެ ރައީސް ބައްސާމް އަދީލް ޖަލީލް، ފުޓްބޯޅައިގެ ހުރިހާ ހަރަކާތްތަކުން ސަސްޕެންޑް ކުރުމަށް، ފީފާގެ އެތިކްސް ކޮމިޓީން މިރޭ ނިންމައިފި އެވެ. ސަސްޕެންޝަނުގެ އަދަދު ދީފައި ވަނީ 90 ދުވަހަށެވެ. އަދި އެއަށް ފަހު އަނެއްކާ ވެސް ސަސްޕެންޝަނުގެ މުއްދަތު އިތުރު ކުރަމުން ގެންދެ އެވެ. އޭއެފްސީ އެގްޒެކެޓިވް ކޮމިޓީގެ މެންބަރުކަމުގެ މަގާމުގައި ވެސް ހުންނެވި، ބައްސާމް ސަސްޕެންޑް ކުރުމުން އެ މަގާމުގެ ހައިސިއްޔަތު ވެސް އޭނާ އަށް ތަމްސީލު ނުކުރެވޭނެ އެވެ. ފީފާގެ ވެބްސައިޓްގައި ބުނެފައިވަނީ ތަހުގީގުތަކުގެ ފުރަތަމަ މަރުހަލާގައި ލިބުނު މައުލޫމާތާއި ލިޔެކިޔުންތަކަށް ރިއާޔަތްކޮށް، އެފްސީއީ [ފީފާގެ ކޯޑް އޮފް އެތިކްސް] ގެ 62 ވަނަ މާއްދާގެ 1 ވަނަ ޕެރެގްރާފްގައިވާ ގޮތުން ފުރަތަމައިން ވެސް މައްސަލައެއް އޮތް ކަމަށް ފާހަގަވުމުން، (ފީފާގެ) ތަހުގީގު ޗެމްބަރުގެ ޗެއާޕާސަން ނިންމީ [ބައްސާމް އަދީލް] ޖަލީލާ ގުޅޭ ރަސްމީ ތަހުގީގުގެ ކުރިއަށް ގެންދިއުމަށެވެ. އެއީ (ފީފާގެ ކޯޑުން) އަންނަނވި މާއްދާތަކާ، ބައްސާމް ހިލާފުވެފައި އޮތްތޯ ބެލުމަށެވެ.