މުއިއްޒު ހޮވަން ޔާމީން ބޭނުން

ވާދަވެރިން އެކިއެކި ވާހަކަ ދައްކަނީ ފިތުނަ އުފެއްދުމަށް ކަމަށް ތުހުމަތުކޮށް ސައީދު ވަނީ އެފަދަ ވާހަކަތަކުގައި ނުޖެހުމަށް އެދިވަޑައިގެންފަ އެވެ. ސައީދު ވިދާޅުވީ ޕީޕީއެމް/ޕީއެންސީއަކީ ޑިމޮކްރެސީގެ ސިފަތަކުން ފުރާ ފުރިހަމަވެފައިވާ ޕާޓީއެއް ކަމަށެވެ.

"ރައީސް ޔާމީންގެ މެސެޖަކީ، އެމަނިކުފާނުގެ އެދިވަޑައިގަތުމަކީ އިންޑިއާއަށް އަޅުވެތިވެފައި އޮތް މި ސަރުކާރު ނިންމާށޭ، އަޅުގަނޑުމެންގެ ކެންޑިޑޭޓަކީ މި ހުންނެވީ އޭ ޑރ. މުއިއްޒޭ. ތި ބޭފުޅުން ނަންބަރު 4 އަށް ވޯޓު ޖައްސަވާށޭ،" ސައީދު ވިދާޅުވި އެވެ.

ސައީދު ވަނީ ޔާމީން ޖަލަށް ވަޑައިގެންނެވުމަށް ފަހު ޕާޓީ ހިންގެވުމާ ހަވާލުވެ ހުންނެވި ޕީއެންސީގެ ރައީސް، ފޮނަދޫ ދާއިރާގެ ކުރީގެ މެންބަރު އަބްދުއްރަހީމް އަބްދުﷲ (އަދުރޭ) އަށް ވަރަށް ބޮޑަށް ތައުރީފް ކުރައްވައިފަ އެވެ. އޭނާ ވިދާޅުވީ އަދުރޭ އަކީ ޔާމީނަށް މުޅި ރާއްޖޭގައި ވެސް ހުރި އެންމެ ވަފާތެރި ސިޔާސީ ބޭފުޅާ ކަމަށެވެ.

މުއިއްޒުގެ ވެސް ހިންގަވަނީ އެ މަގުން ކަމަށާއި، ވެރިކަން ވެސް ކުރައްވާނީ ސީދާ ޔާމީންގެ އިރުޝާދުގެ ދަށުން ކަމަށް އޭނާ ވިދާޅުވި އެވެ.