ރާއްޖެޓީވީގެ ކޮންމެދުވަހެއްގެ ހެނދުނު ގެނެސްދޭ ފަށާއިރު ޕްރޮގްރާމްގައި ރައީސް ސޯލިހު

ރާއްޖެޓީވީގެ ކޮންމެދުވަހެއްގެ ހެނދުނު ގެނެސްދޭ ފަށާއިރު ޕްރޮގްރާމްގައި ރައީސް ސޯލިހު ވާހަކަފުޅުފައްކަވަމުން ވިދާޅުވީ، އެމަނިކުފާނު އާންމުކޮށް ހެނދުނު ހޭލަނީ ހަތަރަކާއި ހަތަރުގަޑި ފަނަރައާ ދޭތެރޭ ކަމަށެވެ. އަވަހާރަފުޅުލައްޕަވަނީ ރޭގަނޑު 12 ޖަހާއިރު ކަމަށެވެ.

"އާންމުކޮށް އަޅުގަނޑު ހޭލަނީ 4 ނޫނީ 4:15 އާ ދޭތެރޭގައި. ތެދުވެ އަޅުގަނޑު ދަމުނަމާދުކުރަން. ދަމުނަމާދުކޮށްފަ ފަތިސްނަމާދު ބަންގި ގޮވަންދެން ގުރުއާން ކިޔަވަން." ރައީސް ސޯލިހު ވިދާޅުވިއެވެ.

ރައީސް ވިދާޅުވީ، ފަތިސް ނަމާދަށްފަހު ލިބޭ ގަޑިއެއްހާއިރު ތެރޭގައި ވިސްނަވަނީ ދުވަހުގެ ބާކީ ކުރަން ހުންނަ ކަންތައްތަކާ ދޭތެރޭގައި ކަމަށެ އަދި ބައެއް ދުވަސްދުވަހު ކީރިތި ގުރުއާނުގެ ދިވެހި ތަރުޖަމާވެސް ކިޔަވާ ކަމަށެވެ.

"ބައެއް ދުވަސްދުވަހު މާ ބުރަކޮށް އުޅޭ ދުވަހެއް ވެއްޖެއްޔާ ކުޑަ ރެސްޓެއްވެސް ނަގަން. އެއަށްފަހު ހެނދުނު އެކްސަސައިޒް އަޅުގަނޑު ކުރަން. މާ އަވަހަށް އޮފީހަށް ދާން އޮވެއްޖެއްޔާ އެކްސަސައިޒް ސްކިޕްކޮށްލާފަ ހަވީރު ގަޑިއަށްލަނީ." އެމަނިކުފާނު ވާހަކަހިއްސާކުރަމުން ވިދާޅުވިއެވެ. 

އެމަނިކުފާނު ފާހަގަކުރެއްވި ގޮތުގައި ދެން އެމަނިކުފާނު ސަމާލުކަން ދެއްވަނީ އޮފީހަށް ހާޒިރޫވުމުގެ ކުރިން ފޯނުގެ ހުންނަ މެސެޖުތަކާއި، ކޯލްތައް ބެއްލެވުމެވެ. އަދި އޮފީސް ގަޑީގައިވެސް ހުސް ވަގުތެއް ލިބިވަޑައިގެންފިނަމަ ފޯނަށް ލިބިފަ ހުންނަ މެސެޖުތަކަށާއި، ކޯލްތަކަށް ޖަވާބު ދެއްވާ ކަމަށް ވިދާޅުވިއެވެ.

އެއަށްފަހު އިންނާނީ އަމިއްލަ ފަރާތްތަކުން ބައްދަލުކުރަން އެދުނީމަދޭ ވަގުތުކޮޅެއްކަމަށާއި އެޕޮއިންޓްމަންޓް ހުންނާނީ ދުވާލަކައް ތިންވަރަކައް އެޕޮއންޓްމެންޓް ކަމައް ރައީސް ވިދާޅުވިއެވެ.