“ސިޔާސީ މުވައްޒަފުން 700 އަށްވުރެ ގިނަ ނުވާނެ”ފިރުޒުލް

އަންނަ ސަރުކާރުގައި ސިޔާސީ މުވައްޒަފުންގެ އަދަދު 700 އަށް ވުރެ އިތުރު ނުކުރަން ނިންމާފައި ވާކަން އިންތިގާލީ މަރުހަލާގެ ތަރުޖަމާނު މުހައްމަދު ފިރުޒުލް މިއަދު ބޭއްވި ނޫސްވެރިންގެ ބައްދަލުވުމުގައި ހާމަކުރައްވާފިއެވެ. އަދި ނިމިގެންމިދާ ސަރުކާރުގައި 1،063 ސިޔާސީ މުވައްޒަފުން އެބަ ތިބިކަމަށާއި އޭގެ ކުރީގެ ރައީސް އަބްދުﷲ ޔާމީންގެ ސަރުކާރުގައި 808 ސިޔާސީ މުވައްޒަފުން ތިއްބެވިކަމަށެވެ. ފިރުޒުލް ވިދާޅުވީ ޑރ. މުއިއްޒު ނިންމަވާފައިވަނީ ޝާމިލް ސަރުކާރެއް އެކުލަވާލައްވަން ކަމަށާއި ކެބިނެޓާއި ސިޔާސީ މަގާމުތަކުގައި ތިއްބަވާނީ ކަމައް ގާބިލް ބޭފުޅުންކަމަށާއި އަދި ވަކި ސީޔާސީ ޕާޓީއަކައް ނުބައްލަވާ ސަރުކާރުގެ މަގާމްތައް އެކުލަވާލާނެކަމަށެވެ. އަދި މަގާމުތަކަށް އައްޔަން ކުރާނީ މުޅިން ވެސް ރައީސަށް ޖަވާބުދާރީވާނެ ކަމުގެ ޔަގީންކަން އޮތް ބޭފުޅުންނެވެ.