ހޫނު އިންތިހާއަށް ގަދަ، ދެ ޤައުމަކުން 19 ޙައްޖުވެރިއަކު ނިޔާވެއްޖެ – 17 ޙައްޖުވެރިއަކު ގެއްލިގެން ހޯދަނީ

މިއަދު މައްކާގެ ހޫނުމިން 48 ޑިގްރީ ސެލްސިއަސް އަށް އެރިއެވެ. ސަޢޫދީން ބުނެފައިވާގޮތުގައި އެންމެ ހޫނުގަދަ ވަގުތުތަކުގައި އެވްރެޖް ގޮތެއްގައިވެސް ހޫނުމިން 44 ޑިގްރީ ސެލްސިއަސްގައި ހުރެއެވެ.އެސޯސިއޭޓެޑް ޕްރެސް (އޭޕީ) އަށް ސަޢޫދީގެ އޮފިޝަލަކު މަޢުލޫމާތުދެމުން ބުނެފައިވަނީ ހޫނާއި ގުޅިގެން އެކި ފަރުވާ ހޯދާފައިވާ އަދި ހޯދަމުން އަންނަ މީހުންގެ ޖުމްލަ އަދަދު އުޅެނީ 10 ހާހުން މަތީގައި ކަމަށެވެ. ޙައްޖުގެ އަޅުކަމުގެ ތެރޭގައި އިރާނާއި އުރުދުން ހިމެނޭހެން ދެ ޤައުމަށް ނިސްބަތްވާ ޙައްޖުވެރިން ނިޔާވި އަދަދު 19 އަށް އަރައިފައެވެ.