ރާއްޖޭގެ ދަނޑުވެރިކަމުގެ ސިނާއަތް ކުރިއަރުވަން އެދޭނަމަ ރާއްޖޭގެ ދަނޑުވެރިން އުފައްދާ ތަކެއްޗަށް ޚާއްޞަ ފުރުޞަތުތަކެއް ފަހިކޮށްދީ އެމަގަށް ސިޔާސަތުތައް ބައްޓަންކުރަންޖެހޭ- ށ.ގޮއިދޫ ކައުންސިލް

ކައުންސިލުން ފޭސްބުކުގައި ބުނެފައިވަނީ ށ.ގޮއިދޫގެ ދަނޑުވެރިން ރަމަޟާންމަހާއި ދިމާކޮށް ކަރާ އަދި އެހެނިހެން ބާވަތްތަކުގެ ތަރުކާރީއާއި މޭވާ ގިނަ ޢަދަކަށް މާކެޓަށް ނެރެފައިވާކަމަށެވެ. އަދި މައިގަނޑު ގޮތެއްގައި ތަކެތި މާކެޓް ކުރެވިފައިވަނީ އަތޮޅަށާއި ކައިރި އަތޮޅުތަކަށްކަމަށެވެ. މިގޮތުން ކުޅުދުއްފުށި މާކެޓް މައިގަނޑު މާކެޓެއްގެ ގޮތުގައި ފާހަގަ ކޮށްލެވޭކަމަށް ބުނެފައިވެއެވެ. ކަންބޮޑުވުން ފާހަގަ ކުރަމުން ބުނެފައިވަނީ މާކެޓްގައި ކަރާގިނަވެ ވަކިން ޚާއްޞަކޮށް އިންޑިޔާ ކަރާ ގިނަޢަދަދަކަށް ރާއްޖެ އެތެރެކޮށްފައި ވުމުގެ ސަބަބުން ކަރާގެ އަގުވެއްޓި ވިއްކުމުގައި ދަތިތަކާއި ކުރިމަތިވެ ގިނަ ޢަދަދެއްގެ ކަރާ ހަލާކުވެ ދަނޑުވެރިންނަށް މާލީގޮތުން އެތައް ގެއްލުންތަކެއް ލިބިފައިވާކަމަށެވެ. އަދި ރާއްޖޭގެ ދަނޑުވެރިކަމުގެ ސިނާއަތް ކުރިއަރުވަން އެދޭނަމަ ރާއްޖޭގެ ދަނޑުވެރިން އުފައްދާ ތަކެއްޗަށް ޚާއްޞަ ފުރުޞަތުތަކެއް ފަހިކޮށްދީ އެމަގަށް ސިޔާސަތުތައް ބައްޓަން ކުރުމަށް ކަމާބެހޭ އެންމެހައި ފަރާތްތަކަށް ގޮވާލާކަމަށެވެ.