ސޮވެރިން ޑިވެލޮޕްމަންޓް ފަންޑުގެ ބިލަށް މެމްބަރުން ވޯޓު ނުދިނުމަކީ ޣައިރު ޒިންމާދާރު އަމަލެއް، އެކަމަށް ރައްޔިތުންނަށް ޖަވާބުދާރީ ވާން ޖެހޭނެ. ރައީސް ޑރ. މުހައްމަދު މުއިއްޒު

ރައީސް މުއިއްޒުގެ ސަރުކާރު ވެރިކަމަށް އައިސް، މަޖިލީހަށް ހުށަހެޅި ފުރަތަމަ ބިލަކީ ސޮވެރިން ޑިވެލޮޕްމަންޓް ފަންޑުގެ ބިލެވެ. ސަރުކާރުން ހުށަހެޅި ސޮވެރިން ޑިވެލޮޕްމަންޓު ފަންޑު ބިލު މަޖިލީހަށް ބަލައިގަތުމަށް އިއްޔެ ތަޅުމުގައި ނެގި ވޯޓުގައި ބައިވެރިވީ އެންމެ ދެ މެމްބަރުންނެވެ. އެއީ ކެލާ ދާއިރާގެ އެމްޑީޕީ މެމްބަރު އިބްރާހިމް ޝަރީފާއި، މާފަންނު މެދު ދާއިރާގެ ޑިމޮކްރެޓްސް މެމްބަރު އިބްރާހިމް ރަޝީދު (ބޮންޑޭ) އެވެ.ނަތީޖާ އެއްވަރުވުމުން، އެ ވަގުތު ރިޔާސަތުގައި ހުންނެވި މަޖިލިސް ނައިބު ރައީސް އަހުމަދު ސަލީމް ވޯޓު ދެއްވީ ބިލު ބަލައިގަތުމަށް ނުފެންނަ ކަމަށެވެ. ރައީސް ވިދާޅުވީ ތަޅުމުގައި ހާޒިރުވެ ތިބެ ބިލަށް ވޯޓު ނުދިން މެމްބަރުންގެ ޣައިރު ޒިންމާދާރު އަމަލަށް ރައްޔިތުން އެ މީހުންނަށް ޖަވާބުދޭން ޖެހޭ ކަމަށެވެ.އެސްޑީއެފް ބިލަކީ ގައުމުގެ އިގްތިސާދު ހަރުދަނާކޮށް، ހަމައަކަށް އެޅުވުމަށް ފެށި އެންމެ މުހިންމު މަސައްކަތްކަމަށާއި އެ ފަންޑަށް ހާއްސަ ގާނޫނެއް ފާސް ކުރުން އެއީ ސަރުކާރުގެ ވައުދެއްކަމަށް ވެސް ރައީސް ވިދާޅުވި އެވެ.