މެމްބަރު ސަނީފްގެ އެތައް ތުހުމަތެއް އެމްޑީޕީ އަށް

މި ސަރުކާރުގެ ވަޒީރުންނަށް ރުހުންދިނުމުގެ މައްސަލާގައި، އެމްޑީޕީން ރުހުން ނުދިނުމަށް ތުރީލައިން ވިޕު ނެރެފައިނުވާ ބައެއް ވަޒީރުންނަށް ސަނީފު ރުހުން ދެއްވުމުން އޭނާ ރިޝްވަތުގެ ފައިސާ ނަންގަވާފައިވާކަމަށް އޮންލައިން ނޫހެއް ގައި ރިޕޯޓުކޮށްފައިވެއެވެ. އެ ތުހުމަތާ ގުޅިގެން  ރައްޔިތުންގެ މަޖިލީހުގެ ޖަލްސާއެއްގައި ސަނީފުވަނީ ވަރަށް ވަރުގަދައަށް ރައްދުދެއްވާފައެވެ. ސަނީފު ވިދާޅުވީ "އަޅުގަނޑުމެން ޕާޓީގެ ތުރީލައިން ވިޕް ނޫން ވޯޓެއް ދިނީމައި އަޅުގަނޑުމެންގެ ވާހަކަދެއްކީމައި މިއީ ލަދުވެތިކަމެއް،" ކަމަށެވެ. އިތުރަށް އޭނާ ވިދާޅުވީ އެވާހަކަދައްކަނީ ޕާޓީގެ ރައީސް ޢަބްދުﷲ ޝާހިދު އަޑީގައި ހުންނަވައިގެން މިއުވާން ލައްވައި ހިންގާ ނޫހެއްގައި ކަމަށެވެ. "ޕާޓީގެ މިއަދުގެ ރައީސް ޢަބްދުﷲ ޝާހިދު އުފައްދައިގެން އުޅޭ ނޫހެއްކަމަށްވާ މިއުވާނުގެ ނޫހުގައި ޕާޓީގެ މެންބަރުން ފަޟީޙަތްކުރުމަކީ މިދާ ދައުރުގައި ދިވެހިރާއްޖޭގެ ރައްޔިތުންގެ މަޖިލީހުގައި ހުރެގެން އަޅުގަނޑު ކުށްވެރިކުރާ ކަމެއް،" ސަނީފު ވިދާޅުވިއެވެ.